Foto: Ørjan Marakatt Bertelsen

Servodatlokten sámegielaide ja taleanttaide

Odne almmuha Riddu Riđđu dán jagi festiválaprográmma. SeastinBáŋku 1 Davvi-Norga lea beassan oaidnit muhttin čiegusvuođaid ovdal gihtii, ja vástida 750.000 ruvdnosaš doarjagiin Servodatloktemis.

Servodatloktema doarjja galgá earret eará geavahuvvot festivála mánáiddoaimmaide vai sámegielat sáhttet leat ealli ja lunddolaš geavahusas servodagas.

– Riddu Riđus lea sierra mánáidfestivála, man ulbmil lea ahte mánát galget beassat oahpásmuvvat sámegielain doaimmaid ja stoahkama bokte. ON eamiálbmotgielaid jagis, lea SeastinBáŋku 1 Davvi-Norga bidjan sierra 1 miljovnna ruvnno iešguđetlágan prošeavttaide mat nannejit sámegielaid. Riddu Riđu mánáidfestivála lea dakkár prošeakta, muhto mii háliidat ain eanet ohcamiid. Servodatlokten galgá iešguđetge vugiid mielde nannet identitehta ja gullevašvuođa davvin. Giella lea guovddáš elemeanta das, ja máŋgasiidda min riikkaoasis lea dat giella sámegiella, dadjá báŋkohoavda Hege Olaussen SeastinBáŋku 1 Davvi-Norggas.

Les saken på norsk: Samfunnsløft for samisk språk og talenter

Arena servodatdigaštallamii

– Riddu Riđđu lea 1991 rájes bargan sámenuoraid rámisvuođa ovdii ja ahte Riddu Riđđu galgá lea máilmmi eamiálbmogiid jietna. Prográmmain mii háliidat guoimmuhit, muhto maiddá hirpmástuhttit ja vuolggahit ságastallama fáttá birra ahte maid mearkkaša leat eamiálbmot odne. Davvi-Norga dárbbaša deaivvadanbáikkiid gos sámekultuvra ja eamiálbmotkultuvra lea guovddážis, dadjá festiválajođiheaddji Sandra Márjá West.

Festivála doaibma deaivvadansadjin ja digaštallanbáikin lea maiddá oassin čilgehusas manne Riddu Riđđu Servodatloktemis oažžu eanet doarjaga go báŋku goassige ovdal lea addán.

– Riddu Riđđu ii leat dušše dábálaš festivála. Digaštallamiid ja semináraid bokte leat dát beaivvit Gáivuonas maiddá dehálaš arena servodatdigaštallamii davi birra davvin, ja unnitlogupolitihka birra. Lea fáddá mas lea stuorra mearkkašupmi olles riikkaoassái, dadjá Olaussen.

Dáiddalaš taleantaovdánahttin máŋgga jagi badjel

450.000 ruvnnu Servodatloktema doarjagis galgá geavahuvvot Riddu Riđu taleantaprográmmii Riddu Sessions:i, mii galgá ovdánahttit nuorra sámi taleanttaid boahtte golbma jagi. Talent Norge ulbmil lea hukset arenaid ja leat ovdamannin taleantaovdánahttimis dáidagis ja kultuvrras miehtá riikka, ja guorrasa SeastinBáŋku 1 Davvi-Norga doarjagiid vel 450 000 ruvnnuin. Dasa lassin veahkehit sii mávssolaš dáiddafágalaš mentoriin ja bagademiin. Dán ovttasbarggu bokte oažžu dalle Riddu Riđđu measta miljovnna ruvnnu oktiibuot ovdánahttit sámi dáiddáriid.

– Riddu Sessions galgá ovdánahttit sámi duddjonnávcca ja sihkkarastit ahte mis jámma lassánit čeahpes ja hutkás sámi dáiddárat buot šáŋŋeriin, dadjá festiválajođiheaddji Sandra Márjá West.

Foto: Ørjan Marakatt Bertelsen

Govva: Ørjan Marakatt Bertelsen